டர்பன் அணி வெற்றி: தென் ஆப்ரிக்க ‘டி–20’ போட்டியில் | ஜனவரி 16, 2023

டர்பன்: தென் ஆப்ரிக்க ‘டி–20’ லீக் போட்டியில் அசத்திய டர்பன் அணி 27 ரன் வித்தியாசத்தில் பார்ல் அணியை வீழ்த்தியது.

தென் ஆப்ரிக்காவில், ஐ.பி.எல்., பாணியிலான ‘டி–20’ லீக் கிரிக்கெட் முதல் சீசன் நடக்கிறது. டர்பனில் நடந்த லீக் போட்டியில் டர்பன் சூப்பர் ஜெயண்ட்ஸ், பார்ல் ராயல்ஸ் அணிகள் மோதின.

‘டாஸ்’ வென்று முதலில் ‘பேட்’ செய்த டர்பன் அணிக்கு கைல் மேயர்ஸ் (39), வியான் முல்டர் (42) நல்ல துவக்கம் தந்தனர். அபாரமாக ஆடிய கேப்டன் குயின்டன் டி காக் (57), ஹெய்ன்ரிச் கிளாசன் (50*) அரைசதம் விளாசினர். டர்பன் அணி 20 ஓவரில் 4 விக்கெட்டுக்கு 216 ரன் குவித்தது. பார்ல் அணி சார்பில் லுங்கிடி, ஈவன் ஜோன்ஸ் தலா 2 விக்கெட் வீழ்த்தினர்.

கடின இலக்கை விரட்டிய பார்ல் அணிக்கு ஜேசன் ராய் (33) நல்ல துவக்கம் தந்தார். பட்லர் (2), கேப்டன் டேவிட் மில்லர் (1) ஏமாற்றினர். இயான் மார்கன் (64), டேன் விலாஸ் (44) கைகொடுத்தனர். பார்ல் அணி 20 ஓவரில் 8 விக்கெட்டுக்கு 189 ரன் மட்டும் எடுத்து தோல்வியடைந்தது. டர்பன் அணி சார்பில் ரீஸ் டாப்லே 3, டுவைன் பிரிட்டோரியஸ் 2 விக்கெட் சாய்த்தனர்.

இதுவரை விளையாடிய 3 போட்டியில், 2 வெற்றி, ஒரு தோல்வி என 8 புள்ளிகளுடன் டர்பன் அணி 3வது இடத்துக்கு முன்னேறியது. பார்ல் அணி 5 புள்ளிகளுடன் (ஒரு வெற்றி, 2 தோல்வி) 4வது இடத்தில் உள்ளது.